O‘rta maxsus ma’lumotli o‘qituvchiga ustama berib bo‘lmaydimi?

08:00 / 10.05.2024 5.54k

Savol

Boshlang‘ich sinf o‘qituvchisiman. O‘rta maxsus ma’lumotliman. Ustama uchun hujjat topshiraman desam “zavuchimiz” o‘rta maxsus ma’lumotli o‘qituvchiga ustama tayinlay olmaymiz deb aytdi. Shu to‘g‘rimi?

Javob

Pedagog xodimlarga ustama tayinlash Vazirlar Mahkamasining 2019-yil 30-sentabrdagi 823-son qarori bilan tasdiqlangan “Umumiy o‘rta ta’lim muassasalarining o‘rnak ko‘rsatgan xodimlarini rag‘batlantirishning direktor jamg‘armasini tashkil etish va uning mablag‘laridan foydalanish tartibi to‘g‘risida”gi Nizom bilan tartibga solinadi.

Ushbu nizomning 24-bandiga ko‘ra umumta’lim muassasasidagi pedagog xodimlar oliy yoki o‘rta maxsus ma’lumotga ega ekanligidan qat’i nazar, belgilangan baholash mezonlari asosida baholanadi va ko‘rsatkichlariga ko‘ra Ishchi guruh qarori asosida bazaviy tarif stavkasiga har oylik ustama belgilanadi.

Ya’ni, o‘qituvchining oliy yoki o‘rta maxsus ma’lumotli bo‘lishi unga ustama tayinlashda hech qanday rol o‘ynamaydi. Asosiysi pedagog xodim nizomda belgilangan baholash mezonlari talablariga javob bersa kifoya.

Xulosa o‘rnida aytadigan bo‘lsak, o‘quv ishlari bo‘yicha direktor o‘rinbosarining talabi qonunchilikka zid.