Ish tajribasi boshqa maktabda ommalashtirilgan o‘qituvchiga ustama bersa bo‘ladimi?

22:30 / 23.06.2024 2.25k

Savol

O‘qituvchining ish tajribasi maktabda ommalashgan bo‘lib, ish joyini boshqa maktabga ko‘chirsa ustama uchun shu maktabdan ball beriladimi?

Javob

Vazirlar Mahkamasining 2019-yil 30-sentabrdagi 823-son qarori bilan tasdiqlangan Nizomga 1-ilova, pedagog, psixolog va kutubxona xodimlarining faoliyatini baholash mezoniga ko‘ra o‘qituvchi ish tajribasining ommalashtirilganligi uchun 7 balldan 15 ballgacha beriladi.

Agar o‘qituvchining ish tajribasi maktab miqyosida ommalashtirilgan bo‘lsa va o‘qituvchi ayni vaqtda boshqa maktabda ishlayotgan bo‘lsa, uning avvalgi ish joyidagi ommalashtirilgan ish tajribasi uchun ball berilmaydi.

Chunki, maktab miqyosida ommalashtirilgan ishga ball berish uchun Ishchi guruhga ta’lim muassasasi miqyosida ommalashtirilganligi to‘g‘risida Pedagogik kengash qarorining elektron (pdf) nusxasi taqdim etilishi lozim.

Ishchi guruh maktab miqyosida ommalashtirilgan ishga ball berishi uchun esa ish tajribasi aynan shu maktabda ommalashtirilgan bo‘lishi lozim.

Diqqat: Agar pedagog xodimning ish tajribasi tuman (shahar), viloyat yoki respublika miqyosida ommalashtirilgan bo‘lsa, unda pedagog xodim ish joyini o‘zgartirgan taqdirda ham ball berilishi mumkin deb hisoblaymiz.